يلا خبر | المصري الكيدز: «حدوتة».. نجمة الأمان

سلمى بنوتة جميلة عندها ٦ سنين، شقية كدا ودمها خفيف، بتحب تضحك وتهزر مع كل الناس، ودايما مامتها كانت تقول ليها بلاش نتكلم مع حد غريب. وفى يوم سلمى كانت رايحة المدرسة ونازلة عاملة تسريحة جنان، شافتها جارتهم وقالت الله يا سلمى على الجمال، لمست شعرها وقالت ليها إنتِ بنوتة جميلة، فرحت سلمى بالكلام وراحت المدرسة.

وكانت أول حصة عندهم ميس إلهام وقالت النهارده الدرس بتاعنا عن الأمان إزاى نحمى نفسنا وجسمنا ونكون دايما فى أمان، رد إياد وقال ما نعملش حاجة تئذينا وإحنا نكون فى أمان، قالت الميس بس ممكن حد غريب هو اللى يئذينا ودا لازم نعرف نتعامل معاه إزاى، ردت سلمى وها نحمى جسمنا إزاى؟، قالت الميس أول حاجة لازم نعرفها فى درس الأمان إن فى مناطق فى جسمنا خاصة جدا مش مسموح أبدا لأى حد إنه يشوفها، ودى بتكون المناطق اللى بتغطيها بالمايوه سواء للولاد أو البنات، ردت سلمى أنا ماما قالت لى عليها وكمان علمتنى إن فى لمسة مش مريحة وكمان نظرة شريرة، طبعا يا سلمى برافو عليكى أى حد يحاول يلمس المناطق الخاصة دى أكيد لمسة مش كويسة، ولازم نعرف نفرق كويس بينهم، قالت سلمى أنا طنط جارتنا الصبح لمست شعرى وقالتلى شكلى حلو، هو كدا صح؟، آه يا حبيبتى دى لمسه حنان. ورن الجرس وقالت الميس بكره نكمل درس الأمان.

وسلمى مروحة مع مامتها دخلت السوبر ماركت، مامتها كانت بتشترى حاجات، سلمى قالت ليها عايزة أجيب شكولاتة من هناك، مامتها قالت لها بسرعة قوام، وقفت سلمى مش طايلة الشيكولاتة، قرب منها راجل كبير متعرفوش قالها تعالى أشيلك تجيبيها وقرب منها ولمسها لمسة مش مريحة، بسرعة افتكرت درس الأمان وزعقت وقالت ابعد عنى ابعد عنى، وجريت على مامتها على طول وحكت ليها، حضنتها مامتها وقالت إنتِ اتصرفتِ صح تمام، وتانى يوم حكت للميس وأصحابها من غير كسوف ولا خوف، والميس قالت ليها برافو عليكى اتصرفتى صح تمام ودا كان بقية درس الأمان، وطلّعت الميس نجمة الأمان وادتها لسلمى وقالت ليها إنتِ كدا عرفتى تحمى جسمك هتكونى دايما فى أمان.