يلا خبر | زوجة رامي جمال تشيد بشريك حياتها مع اقتراب «عيد الحب»: «اتعلم يدّي حقن عشاني»

عبّرت زوجة الفنان رامي جمال عن حُبها وتقديرها لزوجها مع اقتراب «عيد الحُب»، موضحة مدى تكاتف زوجها ومساندته لها أوقات مرضها، لافتة إلى أنها فضّلت تقديم كلمات الشكر للفنان علانية ليس تعبيرًا عن حبها فقط بل لتكشف كم عوّضها كثيرًا خلال سنوات زواجهما.

وقالت «ناريمان» عبر صفحتها الشخصية بـ«إنستجرام»: «البوست مش بوست بتاع حب، دا شكر للأنسان اللى ربنا عوضني به عن كل يوم وحش وصعب عدى عليا في حياتي، الشخص اللى أنا عارفة هو عمل عشاني إيه وغيّر في نفسه إيه عشاني كان بيحاول طول الوقت، وعلى قد ما يقدر يفضل جمبي ويخرجنى من اللى أنا فيه علشان عارف أن محدش هيعمل كده غيره.. رامى اللى بيخاف يشوف حد تعبان أتعلم يدي حقن عشاني».

تابعت: «أنا تقريبا شخص ملوش أصحاب غير اتنين ثلاثة بالكتير أوى هما اللي بيسألوا عليا رغم أني كنت شخص اجتماعي جدا لكن بقالى سنين، وأنا مقررة أكون لوحدي مدام النفاق والكدب والزيف كتروا، يبقى أكيد الوحدة أحلى بكتير، بس رامى كان دايما عارف يعوضنى ويبقى هو جوزي وحبيبي وأصحابي كمان».

واستكملت: «بحمد ربنا عليك وبتمنى ماشفش حاجة وحشة في حياتي تاني علشان مش هستحملها وبشكر القريب اللي كنت فكراه هيبقى جمبي وملقتوش حتى بمكالمة تليفون غير كل فين وفين زيه زي الغريب وشكرا للغريب اللى لاقيته جمبي مهتم وبيسأل وفعلا المواقف دى اللى بتبين مين يستاهل يفضل ومين لأ وغالبا المواقف دي هي اللي خلتني أقرر أكون لوحدى مع جوزى وأهلى وبس وأنا مرتاحة جدا».

في المقابل، رد الفنان على كلماتها قائلًا: «إنتي بنت أصول وتستاهلي أكتر بكتير من اللي إنتي شايفاه كتير لدرجة أنك تكتبي بوست جميل وكلام أجمل ربنا يقوينا على الأيام ويخليكي ليا». يذكر أن الثنائي احتفلا بعيد زواجهما السادس نهاية العام الماضي 2020.