يلا خبر | المصري كيدز: «حدوتة».. أحمد السريع

أحمد ولد ذكى جدا وشاطر ودمه خفيف بيحب يلعب ويهزر وكمان فى الإنجاز ملوش مثيل، دايما يحب يكون الأول فى كل شىء، فى التمرين وكمان فى البيت، وقت الواجب يكون سابق أخوه ومخلصه فى يدوب دقيقتين، ويقول انا جامد جدا وسريع، ولو سألته أى سؤال بيجاوب على طول، ورده بيكون سريع، ويرجع يقول يا احمد يا خطير مفيش منك اتنين، أخوه كان بيكون زعلان عليه ويقول ليه يا احمد الأهم من انك تكون سريع إنك تكون بتعمل الحاجة بضمير والواجب يكون منظم وجميل صحيح إنت بتخلص بدرى كل حاجة وتقول أنا سريع، بس دا بدون أى تنظيم، والخط يدوبك تفكه العين، يرد سريع، ويقول أنا عارف بعمل إيه، قاله لازم تفكر قبل ما تعمل أى حاجه أو حتى قبل ما تتكلم وتقول كلام كبير.

وفِضِل احمد كدا مش بيفكر قبل ما يعمل أى حاجة، وبقت مشاعره هى اللى مسيطرة عليه والغضب بقى كبير وكل يوم فى سباق جديد عشان يقول أنا السريع ويغيظ أصحابه كتير. وفى يوم كانت الميس بتسأل سؤال وطبعا كالعادة احمد رفع بسرعة الإيد وقال أنا عارف بكل تأكيد، بس كالعادة مفكرش فى السؤال ورد رد سريع وكان مش صحيح، كل مرة على الحال دا وينزل يقول لأصحابه أنا ولد جامد وخطير، رد عليه صاحبه وقاله سريع آه بس بدون تفكير، لازم تفكر قبل ما تعمل أى شىء. زعل احمد من كلام صاحبه واشتكى للميس، قالت لأحمد إنت فعلا ولد سريع بس مش هو دا المهم المهم يكون عملك كمان صحيح، قال لها ما أنا بكون عايز أخلص أول واحد.

قالت بس صحيح بتخلص الأول بس بدون أى فايدة. سألها: طب أعمل إيه؟ ردت وقالت: زى ما قالك صاحبك، فكر قبل أى شىء. وبدأ احمد يكتب الكلمة دى قدامه فى كل حتة عشان يفتكر.. وفعلا قبل أى حاجة يعملها يفكر شوية صغيرين وبقت بتطلع أحلى كتير.