يلا خبر | فيفي عبده عن سخريتها من «كورونا» وحقيقة إصابتها بالفيروس: «ماكنتش متخيلة»

طمأنت الفنانة فيفي عبده جمهورها على حالتها الصحية، نافية إصابتها بفيروس «كورونا»، وأرجعت السبب إلى أنها تلتزم بالإجراءات الوقائية والتباعد الاجتماعي وعدم حضور المهرجانات الفنية أو حفلات الزفاف، خوفًا على صحتها وبفعل عدم قدرتها على السير بسبب مشاكل أصابت ساقها الأشهر الماضية.

وقالت «عبده» عبر مقطع فيديو نشرته بـ«انستجرام»: «الناس اللي بتسألني جالك كورونا، أنا بقول لأ لأني كنت محافظة على نفسي ومجاليش كورونا، ومن الأول يمكن ربنا إداني موضوع رجليّا عشان أقعد في البيت وماروحش أي مهرجان أو فرح وأخد كورونا ربنا يمكن عالم بكده عشان رجليّا ماكنتش قادرة أمشي عليها، بطمن جمهوري بشكل رسمي».

وتابعت: «الله يرحم كل اللي توفوا سواء زمايلي أو غير زمايلي، كلنا زي الشجرة اللي بيجي وقت ورقها بيقع، والشباب المتهور اللي مابيسمعش الكلام وبيفكر الموضوع بسيط ويتلمّ، أنا لما كنت بضحك وبقول (مكرونة) وكورونا، ماكنتش متخيلة خالص أن الموضوع صعب أوي كده مش هزار طبعًا لما عرفت أنه مش موضوع هيّن وبيضع أرواح وناس بنحبها ومالوش دعوة بسن ولا أي حاجه فبقى الموضوع خطر والناس تخلي بالها من نفسها».

يذكر أن الفنانة كشفت عن وجود مشاكل بساقها في الأسبوع الأول من ديسمبر الماضي، قائلة خلال فيديو: «أنا عيانة وفي البيت، بتعالج في البيت عشان ضهري واجعني مش أكتر، معنديش أي حاجة، اللي عندي إني أنا محتاجة دعاء الناس، لأني فعلا مكنتش قادرة أمشي على رجليا، الحمدلله رب العالمين أديني بتعالج وإن شاء الله هبقى كويسة».

وقالت «عبده»، خلال مداخلة هاتفية مع الإعلامي وائل الإبراشي، في برنامج «التاسعة» المذاع عبر القناة الأولى بالتلفزيون المصري: «مكنتش بقدر أتحرك فجأة رجلي ولا أي حاجة بدون أي حاجة وبدون أي سبب ونازلة من السرير وحاجة ضغطت على العصب بتاع الرجل وضغط على العصب وألمها فظيع جدا». وأوضحت «عبده»، أنها تلقت كمية كبيرة من الاتصالات ممن يريدون أن يطمئنوا عليها «أنا مش تعبانة للدرجة دي»، لافتة أن مرضها أثر على الرقص الذي كانت تقوم به في المنزل.