يلا خبر | شعر أمينة عبد الله: ذكريات الحاجات

إزاى

ما أخدتش بالك من فرشة السنان

اللى فتحت بؤها ع الآخر

وبقت ساقعة متلجة

بعد أما الفرشة الجديدة اتحطت على رف الحمام

ما افتكرتش

كام مرة وقفت قدام نفس المراية

قبل مواعيدك المهمة..

وكام مرة كنت راضى عن شكلك فيها؟

بمنتهى السهولة

رمتها بمجرد ما بشرتها اسمرت وبقعت

القميص اللى كنت شايله ومخبيه بتاع أول ميعاد

أكل بعضه م الركنة

ومش قادر يسامحك إنك مبتوريهوش للنور

الأفكار اللى كات بتجيلك وانت قاعد ف المترووتكسل تكتبها على ورقة خرجت عرق

وواقفالك النهارده بكشف حساب

الإهداءات اللى كنت بتكتبها على كتبك

عشان تمرر إهداء وحيد لحد انت بتحبه

ح تموت كلها مخاصماك

إلا الإهداء دا

الحاجات اللى كتبت عن ذكرياتك معاها

واخدة منك موقف متشدد جدا

لإنك مئألتهاش؟؟؟؟؟؟ عن ذكرياتها معاك

وكأنك م واخد بالك إنها بتحس