يلا خبر | «شروق» تدرب السيدات على الثقة بالنفس

«على فكرة باباكى ومامتك مش بيحموكى كويس علشان كده في طينة على وشك»، بهذه الجملة بدأت شروق العقدة، 28 سنة، كلماتها، حال سردها قصتها عن التنمر، الذي واجهته منذ صغرها، بسبب وجود وحمة تغطى الجزء الأيسر من وجهها.

تعرضت شروق، خلال سنوات عمرها، إلى أقسى أنواع التنمر، وواجهته على كافة المستويات في الدراسة والشارع، وكادت أن تفقد ثقتها بنفسها وساعدها والدها على تخطى تلك الأزمة.

«بابا، الله يرحمه، قالى إنتى ربنا ميزك عن باقى الناس بالنعمة دى، أي حد يسألك أو يضايقك قوليله دى نعمة ربنا ميزنى بيها عن باقى الناس».

ورغم المعاناة وجدت شروق الحب والتقبل والدعم، من قبل صديقها بالجامعة، وانتهت علاقتهما بالزواج.

«كان نفسى أحب وأتحب زى أي بنت، وكنت خايفة جدًا من رد فعل أهله لما شافونى، لكنهم ماخذلونيش، وكنت خايفة لو حصل أي مشكلة يعايرنى بشكلي؛ لكن هو كمان ماخذلنيش».

ثقة شروق في نفسها جعلتها تلهم نساء أخريات، فقررت أن تُصبح مدربة life coach، لدعم من يمرون بمواقف مماثلة.

«فى بنات كتير كانوا بيكلمونى ويقولوا لى، نفسنا نكون زيك، ويكون عندنا ربع الثقة اللى عندك».

وتنصح شروق النساء، بألا يدفن رؤوسهن في الرمال كالنعام، وأن يرفعن رؤوسهن ضد التنمر، لأن عين المحب لا ترى سوى الجمال.