يلا خبر | المصري كيدز: حدوتة.. الصياد واللؤلؤة

كان فيه مرة صياد بيطلع كل يوم الصبح يصطاد، وكان دايما يرجع معاه سمك كتير، يبيع منه شوية في السوق، وياكل منه واحدة، وفى يوم من الأيام رجع الصياد، ‏بعدما اصطاد، وكان معاه السمكة اللى هيروح البيت ياكلها، إداها لمراته، وقالها: يلا اطبخى لنا السمكة دى بسرعة، عايزين نتغدى، مسكت مرات الصياد السمكة عشان تسويها، وهى بتفتح بقها لقيت جواها لؤلؤة ‏جميلة جدا، وشكلها غريب، ومميز قوى، جريت على الصياد، وقالت له: إلحق شوف لقيت إيه في السمكة! قال: الله.. اللؤلؤة دى جميلة جدا، أنا آخدها وأبيعها في السوق، أكيد هاتجيب لنا فلوس كتير، ‏وراح الصياد على السوق، وعلى محل الجواهر، قال: أنا عندى لؤلؤة عايز أبيعها، ممكن تقول لى تساوى كام؟ بص الجواهرجى عليها، وقال دى غالية جدا، ‏أنا ماقدرش أقول لك تساوى كام! روح في البلد اللى جنبنا، هناك في سوق كبير للجواهر، اعرضها هناك، ممكن حد يقول لك هي تساوى كام، جرى الصياد على سوق الجواهر، وعرض اللؤلؤة، بس مع الأسف كلهم قالوا دى غالية جدا، إحنا ما نقدرش نقول تساوى كام! إنت لازم تروح للملك، وهو اللى يقدر يشتريها منك لأن هو اللى معاه فلوس كتير، فرح الصياد، وقال: أنا معايا لؤلؤة غالية، أروح للملك قوام قوام ‏وأشوف هيدينى كام، دخل الصياد على الملك وعرض عليه اللؤلؤة، فرح الملك بيها جدا، وقال له: أنا هاخدها منك، وهخليك تقعد يوم كامل في القصر تاخد اللى انت عايزه، ويكون تمن اللؤلؤة، الصياد قال: بس يوم كتير قوى، كفاية ساعة ولا اتنين، لكن الملك قاله: ده حق، ولازم تاخده، بدأ الصياد يدخل إوض القصر، أول أوضة كانت مليانة أكل من كل الأصناف، فرح جدا الصياد، وقال: أنا آكل الأول، وبعدين اكمل، وفعلا قعد ياكل كتير كتير، لحد ما خلاص مابقاش قادر يتنفس، قام مشى شوية، لقى أوضة تانية مليانة دهب ومجوهرات، قال: معقول كل الدهب ده! أنا ممكن آخده، وفرح جدا، وقال: أنا هدور على حاجة أشيل فيها المجوهرات، دخل أوضة كمان، لقى فيها سرير كبير مفروش بالحرير، قال: معقول اشوف السرير ده وماريحش عليه؟! أنا هنام شوية، وابقى اقوم اكمل، وراح الصياد في نوم عميق، ماصحيش منه غير على صوت الحراس، وهما بيقولوله: الوقت خلاص راح، فضل الصياد يصرخ، ويقول: الدهب والمجوهرات، أنا كده مأخدتش حاجة، ولما دخل على الملك كان حزين، سأله الملك: عملت إيه، وقضيت وقتك ازاى؟ قاله: أكلت من الأكل والفواكه كتير، وقلت أنام شوية واصحى آخد من الدهب كتير، بس الوقت منى راح، قاله الملك: ده ليك درس كبير عشان تعرف في إيه تستغل وقتك اللى ماتقدرش أبدا تعوضه لإنه غالى جدا زى اللؤلؤة تمام، وتعرف ازاى تستغله، ويومك مايروحش في الأكل والنوم، وتطلع منه من غير ما تستفيد، وتبقى خسرت حاجات كتير.