يلا خبر | متزوجة وحامل تفاجئ مذيعات «كلام ستات»: «بحن لخطيبي ومش قادرة أتقبل جوزي»

فاجأت مُتابعة لبرنامج «كلام ستات» بطلب نصيحة مُذيعات البرنامج حول شعورها بالحنين إلى خطيبها السابق رغم زواجها حاليًا وانتظارها ولادة طفلها، ما دفع إحدى مقدمات البرنامج الأربعة، الفنانة ندى رحمي، إلى مناشدتها نسيان ذاك الشعور فهي تحمل مسؤولية طفل على وشك الظهور بحياتهما.

وقالت صاحبة الرسالة: «حاليًا متجوزة وحامل وقبل الجواز كنت مخطوبة لواحد وكنت بحبه جدًا بس جه بعد سنة اتغير تمامًا، اتغير وأنا سيبته ورجع لحبيبته وخطبها بعدي، وأنا اتجوزت لكن مش عارفة أخرجه من أحلامي ولا عارفة أنساه ولا أتقبل جوزي».

وردت «رحمي» على سؤالها: «لازم تنسيه، انتوا الاثنين شوفتوا حياتكم، وفيه رجل محترم دخل حياتك ومالهوش ذنب، وابنه أو بنته في بطنك دلوقتي، إزاي سامحة بدا؟، ماتهديش بيتك بسبب حاجة مش ماسكاها بإيدك، ولو فيها خير كانت كملت قبل كده، وكمان إنتي اللي حنيتي مش رجع كلمك، يا شيخة!».

ووافقتها المذيعة الثانية الفنانة نهال عنبر، في ردها، وقالت: «فوقي وقولي أنا من النهاردة مش هفكر في الراجل ده، فأنا مش هفكر في راجل وأنا مع راجل تاني لأنه حرام».